Квасот е стар ферментиран пијалок со лековито дејство, кој широко се употребувал во Русија и Украина. На почетокот бил правен од стар пченичен или ржен леб, но покасно почнал да се прави и од цвекло и други плодови. Лековитоста на квасот од цвекло е повеќекратна:

• Ја прочистува крвта
• Помага во чистење на црниот дроб
• Ја помага дигестијата на храна, богат е со пробиотици
• Помага за уредување на столицата
• Цвеклото е богато со калиум, магнезиум, калциум, фолати, Ц витамин итн.

Потребен материјал за подготовка на квас:

1. Тегла од 2,5-3 литри
2. Околу 1 кг цвекло
3. 1 Лажица морска нерафинирана сол
4. 60 мл (4 супени лажици) сурутка
5. Филтрирана или изворска вода

Подготовка на квасот:

1. Измиеното цвекло излупете го и исечете го на коцки со големина од отприлика 1,5 - 2 см. Немојте да го рендате цвеклото или да го сечете поситно бидејки шеќерот ќе се ослободи нагло во течноста и наместо млечно киселинска ферментација - која ви е потребна, процесот ќе премине во алкохолна ферментација. Теглата да биде добро измиена, како и целиот прибор кој го користите, за да не дојде до контаминација на материјалот со непожелни бактерии.
2. Исецканото цвекло ставете го во теглата, додајте ја солта, сурутката и наполнете ја теглата со филтрирана или изворска вода (да нема хлор). Оставите празен простор од отприлика 2 прста.
3. Покријте ја теглата со газа и чувајте ја 2 дена на собна температура, далеку од директна светлина.
4. Доколку на површината има бела пена или скама отстранете ја и фрлете ја.
5. Откако ќе поминат два дена ставете ја теглата со квас во фрижидер и пијте наутро и навечер на гладно по 120 мл.

Квасот има освежувувачки вкус, мирис на цвекло и ќе биде благо газиран.

Откако ќе го испиете квасот, со истото цвекло можете да направите уште една тура, со тоа што повторно ќе додадете сурутка и сол, а можете како маја да користите и еден шол квас од претходната тура. Имајте во предвид дека втората тура квас ќе биде нешто послаба.

Совет:

Долку не сакате да користите сурутка, можете сурутката да ја замените така што ќе ставите двојно поголема количина на сол. Но, во тој случај ферментацијата ќе трае подолго: околу 7-8 дена.

Наздравје!